Muhammed’dir (S.a.v.)

Musiki

KASÎDE-İ MUHAMMEDİYYE

Ezel mahbûb-i Sübhânî Muhammed’dir Muhammed’dir Ebed matlûb-i Rahmâni Muhammed’dir Muhammed’dir

Cemâli “cîm”e mücellâ kemâli “mîm”ine me’vâ Nevâli nûruna mebnâ Muhammed’dir Muhammed’dir

Rumûz-i gaybına burhân turûz-i ‘aynına a’yân Künûz-i mülküne sultân Muhammed’dir Muhammed’dir

Hitâb-ı nassı “a’teynâk” nikâb-ı hâssı zât-ı pâk Medâr-ı rütbe-i levlâk Muhammed’dir Muhammed’dir

Nübüvvet bezminin sadrı risâlet şemsinin nûru Şefâ’at lutfunun bahri Muhammed’dir Muhammed’dir

Mücessem nûr-i Yezdânî mu’azzam sırr-ı Sübhânî Yüzü mir’ât-ı Rahmânî Muhammed’dir Muhammed’dir

Harîm-i Leyle-i İsrâ nedîm-i vuslat-ı Mevlâ Mukîm-i vahdet-i kübrâ Muhammed’dir Muhammed’dir

Ulâya eyleyen mi’râc kamû imkân ona muhtâc Risâlet bezmine sertâc Muhammed’dir Muhammed’dir

Cihândır ‘aşkına meczûb kapusu ‘âleme matlûb Hudâ’ya ‘âşık u mahbûb Muhammed’dir Muhammed’dir

Bütün ‘âlemlere maksûd Habîb-i lemyezel ma’bûd Delîl-i cümle-i mevcûd Muhammed’dir Muhammed’dir

Se’âdet nûruna kâsim şefâ’at bezmine hâkim Risâlet tahtına hâtim Muhammed’dir Muhammed’dir

Kime erse anın ‘aşkı bulur ol Sâmiyâ Hakk’ı Şefî’ olan bütün halkı Muhammed’dir Muhammed’dir

Şeyh Abdurrahmân Sâmî Saruhânî Kaddesallahu Sırrahu’l-Âlî

Uşşaki Tarikatı